Intego yabo ni ugukura abandi mu mwijima bakakira umucyo uva ku Mana.

Nyuma yo kurobanurwa nk’uko Yesu yarobanuye intumwa ze, igasigwa amavuta y’igikikundiro kuri ubu iyi korali yitwa “Cornerstone” igiye kumurikirwa abakunzi b’umusaraba mu gitaramo cyayo bwite.

Korali Cornerstone ibarizwa mu itorero ry’Ubumwe bw’Ababatisita mu Rwanda (UEBR) Paruwase ya Kigali, kuri ubu yateguye igitaramo mu ndirimbo zo kuramya no guhimbaza Imana n’Ijambo ry’Imana izamurikamo umuzingo wa mbere w’indirimbo.

Korali Cornerstone izwiho kumenya gutsura umubano n’andi makorali, yanze kubyihererana nk’uko na Kristo yanze kugundira akamero k’ubumana. Yisunze amakorali azwiho gutahana iminyago aho yerekeje ubutumwa hose. Ayo makorali ni Gisubizo Ministries, Korali Shalom ya ADEPR Nyarugenge na Voice of Angels.

Tuganira na Julien Dushimimana, Umuyobozi wa korali Cornerstone, yatubwiye ko iki gitaramo cyitezwemo guhembura imitima y’abazakitabira. Ni igitaramo kizaba ku Cyumweru tariki 26/5/2024 saa cyenda mu ihema rinini rya Camp Kigali.

Nta kiguzi cyo kwinjira muri iki gitaramo cya Korali Cornerstone cyashyizweho kugira ngo umuntu wese wifuza gutarama atazagira inkomyi y’ubushobozi.

Iki gitaramo kizabera Camp Kigali kwinjira bizaba ari ubuntu.

Iyi korali  yatangiye 2014, itangirana abaririmbyi 25, ubu bamaze kuba abaririmbyi 80 b’ingeri zose. Imaze gukora ingendo z’ivugabutumwa n’ibiterane bitandukanye mu mujyi wa Kigali no mu ntara zitandukanye.

Album izamurikwa ni iya mbere izaba igizwe n’indirimbo 6 z’amajwi n’amashusho kandi hazabaho n’igikorwa cyo gufata andi majwi n’amashusho (Live Recording) ya Album ya kabiri nk’uko umuyobozi w’iyi Korali Julien Dushimimana abitangaza.

Umwanditsi: Nyawe Lamberto M.