Umuryango mugari wa Horeb Choir kuri ubu uri mu gahinda ko kubura umwe mu baririmbyi bayo Niyonkuru Prudence witabye Imana azize urupfu rutunguranye.

Iyi nkuru y’inshamugongo yamenyekanye kuri uyu wa kane, tariki 23/05/2024 ahagana saa moya za mu gitondo.

Mu itangazo dukesha umuyobozi wa Horeb Choir, Bwana Aaron Muragijimana, rigira riti: "Bavandimwe bagize umuryango mugari wa Horeb Choir, tubabajwe no kubamenyesha ko umuririmbyi wacu Prudence Niyonkuru yitabye Imana. Dukomeze twihangane".

Niyonkuru Prudence akaba asize uruhunja rwari rumaze  iminsi ine dore ko yibarutse ku cyumweru. Urupfu rwa Prudence rwaciye igikuba mu baririmbyi ba korali Horeb, dore ko yari umwe mu baririmbyi bagira ishyaka ry’umurimo w’Imana nk’uko byemejwe na Aaron Muragijimana. Gusa, bahamya badashidikanya ko yabonye ubugingo, bitewe n’ubwitange yagiraga mu murimo w’ Imana.

Ikiriyo kikaba cyatangiye kuri uyu wa Kane tariki 23/05/2024, kiri kubera ahitwa Karuruma mu murenge wa Jabana aho nyakwigendera yari atuye.

Uru rupfu rukaba rusa nk’urwa Mukambaraga Solange bitaga Cadette wari umutoza w’amajwi wa Horeb Choir rwabaye mu mwaka wa 2014 dore ko na we yasize uruhinja.

Horeb Choir ibarizwa muri CEP/UR Gikondo Campus. Igize ibyago mu gihe yitegura ivugabutumwa ryo ku cyumweru tariki 26 Gicurasi 2024. Ni ivugabutumwa rizabera kuri Paruwase ya ADEPR Gatenga.

 Imana mwakire mubayo.