Ni we muyobozi w’Ihuriro ry’Imiryango ishingiye ku myemerere ariryo (RIC), akaba n’ umuyobozi wungirije w’insengero zose za Deliverance Churches, yitwa Bishop Rose Karasanyi. aha yahaga Umuyobozi w’Umurenge wa Kicukiro igikombe cy’ishimwe amushimira imikoranire myiza bafitanye.

Ni giterane cyateguwe n’ umuryango RIC/Kicukiro, ubarizwamo amadini n’amatorero 14, ku bufatanye n’ubuyobozi bw’Umurenge wa Kicukiro kuri ubu uhagarariwe n’Umunyamabanga Nshingwabikorwa witwa Mukandahiro Hydayat, mu Karere ka Kicukiro, mu Mujyi wa Kigal. Iki giterane cyarabaye kuri iki cyumweru tariki ya 26 Gicurasi uyu mwaka turimo wa 202. Cyari kigamije  gushima Imana ku bw’ibyiza yabagejejeho mu myaka 30 ishize.

Nk’uko yabigarutseho, mu ijambo rye ryanyuze ku muyoboro wa YouTube (livestream) wa Deliverance Church Kigali-Rwanda, Bishop Rose Karasanyi  yagaragaje ko mu byo bashimira Imana harimo n’ubuyobozi bwiza u Rwanda rufite, kuko ari bwo butuma abaturage bose bashobora gusenga mu mahoro.

Mu mvugo ye yagize ati: “Dushimiye Imana yaduhaye amahoro nk’Abanyarwanda. Dushimiye Imana yaduhaye Nyakubahwa Paul Kagame, Intore izirusha intambwe, tukaba dukorera Imana dutekanye; ibitekerezo dufite tubishyira mu bikorwa.”

Yakomeje ashimira Umuyobozi w’Umurenge wa Kicukiro ari we Mukandahiro Hydayat, yungamo ati: “Ibibembe twarabikize, tugarutse imbere yawe tugushima, twashimiye Imana ariko nawe turagushimiye.” Yamuhaye igikombe cy’ishimwe cyanditseho ngo “RIC turashimira imikoranire myiza m’Umurenge wacu wa Kicukiro.”

Yakomeje asobanura ibyo bashimira Imana, ariko byumwihariko agaruka cyane ku buyobozi bwiza ati: “Icya mbere twishimira ni uko dufite igihugu n’ubuyobozi bwiza. Bamwe twavutse tutagifite.”

Mu mvugo ye yakomeje agira ati:’ ’Turabikesha Perezida Paul Kagame n’abo bayoborana bose, ari na yo mpamvu twafatanyije n’ubuyobozi bw’umurenge buhagarariye ubuyobozi bukuru bw’igihugu cyacu. Twahuye kugira ngo dutarame tuvuga tuti ‘Mana wakoze, wadukoreye ibikomeye none natwe turishimye!’

Yakomeje asobanura ibindi byinshi bashimira Imana agira ati: “Abayobora insengero n’imisigiti byo muri uyu murenge, twaricaye duhuza ibitekerezo n’imbaraga turavuga tuti ‘ntihakagire umuturage wa Kicukiro usonza,’ dutangira mituweli abantu benshi;

Dufasha imiryango yari mu manegeka, dukangurira urubyiruko kwitabira ibikorwa bya Leta no kwirinda inda zidateganyijwe. Nyuma y’imyaka 30 ishize, twasubije amaso inyuma, turavuga tuti ‘mureke duhure, dushimire Imana yaduhaye ubuyobozi bwiza n’igihugu cyiza.’”

Uretse uyu muyobozi wa RIC, Bishop Rose Karasanyi, abanda bari bitabiriye iki giterane harimo abayobozi b’amadini n’amatorero, abayobozi bo mu nzego za Leta n’abandi bakristo. Abari aho batanze ubuhamya bagaragaza ko bishimira ubuyobozi bwiza butuma bashobora gusenga mu mahoro.

UMWANDITSI: NYAWE LAMBERTO M.