Barashima Imana ko uyu mwaka wababereye umwaka mwiza, ni umwaka bakoreyemo ibitaramo byinshi byiza kandi biteguye ku rwego rwo hejuru

Ni mu gihe habura iminsi ibarirwa ku ntoke kugira ngo Fabrice na Maya bataramire abakunzi babo, bashyize ibihangano byabo ku mbuga nkoranyambaga zigiye zitandukanye basanzwe bakoresha.

Aba baramyi babarizwa mu itsinda rizwi nka Heavenly Melodies Africa mu buryo butagoranye ushobora kubona indirimbo ku mbuga nkoranyambaga zabo nka Spotify,Apple Music,Boom Play na Deezer.

Indirimbo yitwa “Ndamuhimbaza” ni mwe muri izo ndirimbo. Iyi ndirimbo ikoranye ubuhanga bujyanye n’iterambere tugezemo, bitewe n’uruvange rw’ibikoresho bya muzika biyigize kandi biryoheye amatwi. Iyi ndirimbo iri mu njyana y’inyamerika. Ni imwe mu ndirimbo byitezweho ko izaryoshya stage kuri iki cyumweru.

Ku mbuga zabo urahasanga izindi ndirimbo nka Sifa na Shangwe, Emmanuel, Nje gushima, Jina lenye nguvu, Elohim, Christ our King n'izindi …! Bikaba bikozwe mu gihe kuri uyu wa 02/06/2024, kuri CLA Nyarutarama, hateganyijwe igitaramo cyo kumurika Album cyiswe "Transformation Africa".

Igitaramo Transformation Concert, kiri  ku rwego rwo hejuru cyane kuko cyateguwe n'umuramyi, akaba na Producer Fabrice Nzeyimana n'umugore we Maya Nzeyimana, bakomoka mu gihugu cy’abaturanyi cy’u Burundi ariko bakaba batuye mu Rwanda. Muri iki Gitaramo, iyi “couple” izafatanya na “couple” ya Appolinaire na Jeannette mu kuzana ibyishimo mu mitima.

Ubwo yaganiraga na Holyroom, abajijwe kuri iki Gitaramo, Fabrice Nzeyimana yagize ati: "Iki ni gitaramo kidasanzwe kuri twe, dore ko iki ari cyo gihe cyiza cyo gushima Imana ku bw'ibikorwa tumaze imyaka dukora bigamije kuzamura abaramyi binyuze mu itsinda rya Heavenly Melodies Africa.”

Ntabwo ari concert ya 1 iri tsinda ryitabiriye, dore ko tariki ya 01/03/2020 muri Kigali Arena habereyemo igitaramo cy'uburyohe cya James & Daniella, bamurikaga Album yabo ya mbere bise 'Mpa amavuta'! Ni igitaramo cy'umwihariko cyaririmbyemo abaramyi baririmbana ari babiri nk'umugabo n'umugore. Mu baririmbye muri iki gitaramo hakaba harimo n'iri tsinda rya Fabrice Nzeyimana n'umugore we Maya Nzeyimana (Fabrice & Maya); akaba ari na ho bafatiye amashusho y'indirimbo nziza cyane bise 'Muremyi w'Isi’.

Yongeye kubazwa ku bijyanye n’umwihariko w'iki gitaramo, Fabrice Nzeyimana yakomeje agira ati: "Iyi concert izaba cyane cyane ifite umwihariko w’ivugabutumwa muri buri kantu tuzakora! N’uzagakora wese! Burya usomye inyishu zanjye wabona ko ndikugerageza kudashira imbere abantu bazakora kugira tuzaze twiteze icyo Yesu akora uwo musi.” Yakomeje agira ati: "Yego Yesu Kristo azabikora anyuze mu bantu ariko munkundire muri iyi misi tubanze tuvuge kuri message iri muri ‘Transformation album then’ tuzagaruke nyuma kubantu wenda twatumiye.”

Asobanura ku mvano y'Ijambo ‘transformation’ bifashishije nk'intego y'iki gitaramo,yagize ati: "Transformation kuri twe ni ubutumwa bwaje mu buzima bwacu nk’ijambo Imana yaduhaye rivuga ngo kuvuga Imana, kuririmba Imana, kuja mw’itorero, gutegura za concerts niba bitaduhindura ubuzima bwacu cyangwa ngo binahindure aho tubaye, igihugu tubamo twaba dukora ubusa. Muri make kuki dukora ibyo dukora?” Aha yashimangiye ko iki gitaramo kigamije guhindura imitima y'abantu no kunyaga Satani imitima yanyaze binyuze mu ndirimbo zuje ubutumwa bukura abantu mu bwami bw'umwijima bukabatuza mu mucyo ari wo Kristo Yesu.

Abajijwe ku impamvu atatumiye “couple” ya James & Daniella, “couple” bafitanye umurunga w'imikoranire, yirinze kugaragaza impamvu. Yagize ati: "James na Daniella ni incuti zacu dukunda cyane kandi na bo baradukunda cyane. Dusanzwe dukunda gutumira abandi bahanzi mu bintu byinshi nka “Overflow” dusanzwe dutegura tugatumira abantu benshi. Gusa Kubijyanye n’abo twatumiye muri iyi “transformation” kuri iyi saha tuvugana ntabwo turabitangaza.”

Kuri iki iitaramo "Overflow”, ni umugoroba wo kuramya Imana utegurwa na Heavenly Melodies Africa - itsinda rigamije guhuriza hamwe abaramyi batandukanye, hagamijwe kurushaho kwimakaza ubwami bwa Kristo mu mitima y’abantu. Kuri ubu, iri tsinda rikaba rikorera mu bihugu nka Kenya, Uganda, u Burundi, ndetse n'u Rwanda. Iki gitaramo “Overflow” kikaba giteganyijwe mu Kwakira 2024.

Heavenly Melodies Africa ntabwo ari iya vuba kuko yatangiye taliki 15-05-2005, itangijwe na Producer Fabrice Nzeyimana. Mu mwaka wa 2011 ni bwo yaje guhura na Maya biyemeza gufatanya guteza imbere umurimo w'Imana; ari na bwo yinjiye muri Heavenly Melodies Africa. Nyuma baje gushyingiranywa mu mwaka wa 2014.

Fabrice na Maya bagiye gukora igitaramo cy’amateka

UMWANDITSI: Nyawe Lamberto