Mu nkuru iheruka twavuze ko tuzakora umwitozo wadufasha gutanga imbabazi ku baduhemukiye.

Umwanditsi Pierre Pradervand atubwira zimwe mu nteruro ushobora gukoresha wiga kubabarira.

Urugero: “ Niyemeje kubabarira kanaka ……………….. (aho hari utudomo urashyiramo izina ry’uwakubabaje ryaba iry’umuntu, iry’ikigo runaka, itorero,…) kandi nakiriye amahoro n’umudendezo bituruka mu kubabarira.

Iyo nteruro ikoresha imbaraga z’ubushake ufite, bikarema imbaraga zigufasha guhinduka. Mu rugero rukurikira, wemerewe gukoresha amagambo yawe ushaka, ku buryo icyo iyo nteruro ishaka kuvuga kidahinduka.

Izi ni interuro zitandukanye, ushobora gukoresha ugerageza kubabarira uwakubabaje.

1.       Mpisemo kubabarira ………………… (urashyiramo izina ry’uwo wifuza kubabarira) uvuge n’icyo yaguhemukiyeho. urugero: kuko yiyegereje umugabo wanjye cg umugore wanjye kugeza amutwaye cg se kuko yirirwa amvuga hose mu biro, kuko anteranya n’umukoresha wanjye, …

uravuga ikindi icyo ari cyo cyose umushinja kuguhemukiraho.

2.       Nemeye kurekura amarangamutima y’urwango, amarangamutima y’umujinya mwinshi mufitiye (uravuga izina rye).

3.       Ndemera neza ko kumubabarira (urashyiramo izina rye) ari njye bifitiye umumaro kuko nzagira amahoro, nkagira ubuzima bwiza, nkashobora kwishima ntagifite uwo mutwaro nirirwa nikoreye umvuna ku busa.

4.       Niyemeje kumubabarira (urashyiramo izina rye)  kandi ndemera kwakira amahoro n’umudendezo bizanwa no gutanga imbabazi.

Muri izo nteruro zose, ushobora guhitamo imwe ushaka, wumva yagufasha kubabarira uwakubabaje, ariko nawe ushobora guhimba interuro mu magambo yawe.

Niba wemera Imana ukumva yabigufashamo, ntutinye kuyibwira ngo igufashe.

Uwo ni umwitozo udakorwa umunsi umwe ngo uhite ushobora kubabarira, ahubwo ni urugendo rukorwa, kugeza igihe ushoboreye kubabarira. Bishobora kumara iminsi mike, amezi make cg se imyaka mike.

Uhitamo igihe runaka ku munsi, uzajya usubiramo iyo nteruro wahisemo gukoresha. Ushobora kujya uyivuga mu gitondo, ku manywa cg se nimugoroba. Biba byiza iyo ubivuga uranguruye ijwi rigasohoka, ukagerageza kwitega amatwi ukumva ibyo uri kwibwira, ukava ku munwa ukinjira imbere muri wowe. Ushobora kujya usubiramo iyo nteruro ukoresha, inshuro 2 cg se 3 ndetse ushobora kuyisubiramo inshuro zirenze izo, kugeza ubashije kwiyumva. Gusa ni byiza kubivuga buri munsi.

Ugomba kumva amarangamutima azamuka muri wowe igihe uri kubivuga (umujinya, agahinda, urwango,…) ukayemera ntuyacire urubanza kuko aje muri wowe, kandi nawe ntiwicire urubanza kuko uyagize. Niyo mpamvu ari byiza kujya ahantu uri wenyine kandi wumva utuje kugira ngo ayo marangamutima asohoke.

Niba uwo mwitozo uzamuye amarangamutima wabitse muri wowe igihe kirekire kandi ukaba wumva unaniwe kuyakira, byaba byiza urebye umuntu mukuru wizera akabigufashamo cg se ukareba umuganga ubizobereyemo akabigufashamo.

Umutwaro w’urwango, inzika, umujinya,… uraremera cyane kandi ugera aho ukananirwa kuwikorera kuko ibyo bibi byose ubitse muri wowe bigenda byangiza wowe gahoro gahoro, byangiza ubwonko bwawe, bikangiza ubuzima bwawe, kuko nyuma y’igihe ubifite ugira indwara z’umubiri kandi wazivuza ntizikire, kuko ikizitera kiracyari muri wowe. Ariko iyo uhisemo kubabarira uba uhisemo kubika muri wowe ibyishimo byo kubaho kandi uba uhisemo ubuzima buzira umuze. Ibyo bituma ibyishimo bigaruka muri wowe, imbaraga zikagaruka, n’ibindi byiza byinshi.

Kugira ngo ubyumve neza, wajya ahantu hiherereye ariko ushobora kubona amabuye matoya n’amanini, ugafata ibuye rishushanya ingano y’urwango ufite (uburemere bw’urwango, inzika, umujinya ufite) ku muntu runaka cg se ku bantu runaka, ushaka kurekura cg se kuruhuka. Uritware mu gafuka niba utinya ko abantu barikubonana, niba utabitinya uritware mu ntoki. Ukore urugendo rungana n’iminota cumi n’itanu (15) cg se mirongo itatu (30) usubiramo aya magambo uti: “ninjye uteruye iri buye, ntabwo iri buye ari ryo rinteruye. Igihe cyose ndi bushakire kurishyira hasi ndabikora, ndarishyira hasi”.

Icyo uzamenya ni uko ibuye rirakuremereye kandi uri bushakire kurishyira hasi urarishyira hasi. Igihe uzashakira kurekura urwango, uburakari n’inzika biri muri wowe uzabikora. Kubigumana ni uguhitamo guhora mu karengane waba ubishaka cg utabishaka. Ni ukwemerera amarangamutima mabi atari ayawe nk’uko iryo buye atari iryawe, kukugira umukoloni mu mutwe igihe cyose kandi ndakeka ko nawe atari byo ushaka. Urufunguzo rwo kongera kubona amahoro n’umudendezo ruri mu biganza byawe, niwemera kurekura amarangamutima y’urwango, inzika n’umujinya.

Hari indwara yitwa constipation mu ndimi z’amahanga, mu Kinyarwanda bayita impatwe, nta muntu wahitamo kubana nayo ku bushake kandi azi neza ko hari umuti wamukiza. Ayo marangamutima y’umujinya n’ibindi bijyanye nawo bigereranywa na constipation yo mu bwonko. Ariko icyiza cyayo ni uko yo itandukanye na constipation isanzwe y’umubiri, kuko mu gihe ushobora kuvura constipation y’umubiri ikoroha ariko ikongera ikagaruka, umuti constipation y’ubwonko wo ntabwo ujya unanirwa kuvura, ntabwo ujya utsindwa, wo uravura kandi ugakiza burundu. Ingaruka z’uwo muti wo kubabarira ni ukongera kubona ibyishimo byo kubaho wari warabuze, koroherwa kw’imbere muri wowe mu mutima.

Abantu benshi baba barababajwe cg se barahemukiwe bakunda kuvuga ngo “nataza kunsaba imbabazi, nakomeze ategereze, sinzamubabarira”.

Ikibabaje ni uko ushobora kuba ari wowe uzahora utegereje ko aza kugusaba imbabazi, kandi ibyo ushobora kubitegereza iminsi myinshi, amezi menshi, imyaka myinshi cg se ubuzima bwawe bwose. Kandi urwango cg se ibindi bitekerezo bibi biterwa no kutababrira, byo ntabwo bizakuvamo ngo bigende ahubwo bizakugumamo n’iyo wava muri ubu buzima uzabijyana muri wowe. Ushobora gusanga ibyo tutashatse kwiga no gukora muri ubu buzima tuzakomereza amasomo yabyo mu bundi buzima. Kandi uko wanga kwiga isomo runaka uryigizayo niko kuryiga nyuma bizagukomerera kurushaho.

Ku bemera bibiliya ijambo ry’Imana rivuga ko Umuremyi wacu adushakira ibyiza kandi ibyo uwo Muremyi afite, avuga ko natwe ari ibyacu. Mu butumwa bwiza uko bwanditswe na Luka 15:11-32 havugwa umugani w’umwana w’ikirara. Umwana muto uwo wari warabaye ikirara, amaze kugaruka umubyeyi we akamwakira, mukuru we yararakaye aravuga ati: “reba nawe. Uzi imyaka yose maze ngukorera. Nta tegeko ryawe na rimwe narenzeho, nyamara ntiwigeze umpa n’agahene ngo nishimane n’inshuti zanjye. None uriya muhungu wawe wamaze ibyawe abisangira n’indaya, igihe abungutse uba ari we ubagira ikimasa cy’umushishe”. Se aramubiza ati: “mwana wanjye wowe turahorana n’ibyo mfite byose ni ibyawe”. Iryo sezerano rirakomeye kuko ntabwo yamubwiye 99% y’ibyo mfite ni ibyawe ahubwo yaramubwiye ngo ibyo ntunze byose ni ibyawe. Ijana ku ijana (%) y’ibyo Imana itunze, natwe turabifite, ni ukuvuga ko n’imbabazi ziri muri twebwe, ahubwo icy’ingenzi ni ukwemera kuzirekura.

Tubararikiye kuzakomeza gukurikira iri somo, ryadufasha gutanga imbabazi ku watubabaje cg se ku waduhemukiye.

Imana ibahe umugisha.

Byanditswe na NAHAYO Pélagie

Ibyifashishijwe:

Igitabo “se faire le cadeau du pardon” cya Pierre Pradervand.