Nk’uko tubikesha umwanditsi Pierre Pradervant, mu gitabo cye cyitwa “kwiha impano yo kubabarira” ushobora gutangira uvuga ngo:

“njye ndumva ukwiye kunsaba imbabazi, … ugakomeza umusobanurira ikosa yagukoreye, utibagiwe kumubwira icyo uri kumusaba gukora ngo arikosore cg se gusana ibyo yangije.

Urugero: “uti ugomba kunsezeranya ko utazongera, …” cg se uti: “ugomba kunsubiza ibyo natakaje kubera wowe”, n’ikindi cyose wifuza ko akora ngo bikubohore.

Ntugateshe agaciro imbaraga zihindura kandi zikiza imibanire yanyu ikongera kuba myiza, biturutse ku kubwirana ukuri ku ikosa ryabayeho.

Ugomba gukoresha umutimanama wawe, ariko na none ntabwo wajya usaba ko bagusaba imbabazi kuri buri kantu kose kabayeho, niba bagukandagiye ku kirenge batabishaka, uti “nsaba imbabazi”, niba agashyimbo kakuguyeho uti byacitse nimunsabe imbabazi, … ugomba kumenya ibyo uvuga ko bagusabira imbabazi kandi bikaba ari ibintu by’ingenzi, bitabaye ibyo, ugiye ushaka ko bagusaba imbabazi kuri buri kantu, ibyo byarangira bitaye agaciro, bakagira ngo ni ugukunda ko bagupfukamira gusa. Ikindi ni uko nawe ugomba kuba usukuye umutima witeguye kubabarira, ukaba utiteguye kwihorera, cg se kumwishyura, guhora umucira urubanza, umubwira ko ubwo agize gutya ubwo agiye gusubira muri ayo makosa. Ibyo bizagufasha kuvugana n’umutima wawe, bitume na mugenzi wawe afungura uwe, aho kugira ngo ahore ahagaze ku makosa ye.

Uru ni urugero rw’interuro ushobora gukoresha ushaka ko umuntu wari wagusezeranyije kuguhamagara ntabikore, agusaba imbabazi:

1.       Kuki utampamagaye nk’uko wari wabinsezeranyije ejo hashize nimugoroba? Byarandakaje  cyane.

2.       Nategereje ko umpamagara kugeza mu gicuku. Nagize ubwoba bwinshi ntekereza ibintu byinshi bitari byiza, natekereje ko hari ibidasanzwe byakubayeho.

Ugomba kumubwira amagambo atuma yumva ko yagukoreye amakosa, kandi ukamwereka ibyo wari witeguye yatumye utabona cg se utumva. Ugomba kumubwira ibikora ku myumvire ari nabyo bikunda gukoreshwa mu gukuza imyumvire y’umuntu kandi utamusobanuriye ko ari byo washakaga.

Umwanditsi dr.DAVID R. Hawkins yanditse igitabo “ pouvoir contre la force- les determinants caches du comportement humain” ugenekereje wavuga ko ari “ubushobozi bw’imbaraga zihishe ziri mu muntu”. Yerekanye ibyiciro by’imyumvire y’umuntu ku bintu runaka, ko biva ku kigero cya (degre) 20 kugera ku 1000. Icyo kigero cya nyuma ari cyo  cya 1000 cyagiye kigerwaho n’abantu bake cyane ku isi, ari bo nka Yesu(Yezu) na Bouddha. Nizeye ko gusobanukirwa ibyo byiciro by’imyumvire bishobora guhindura imibereho yawe.

Kuva kuri 20-200, umuntu aba ari mu mbaraga zibona ibibi gusa: uba ufite amarangamutima yo kwicira urubanza wumva wiyanze, uhora ufite ubwoba kandi wishyira hejuru kurusha abandi, wumva ari wowe ufite ibibazo kurusha abandi, wumva ari wababaye kurusha abandi, wumva waragowe kurusha abandi, buri gihe uhora wumva ibibazo byawe biruta iby’abandi…

Ku kigero cya 200, uba uri kuva mu rwego rwo guhora ubona ibibi gusa, utangiye kubona bike byiza, aho ugira imbaraga ugatangira kwemera ko hari ibyiza bishoboka, ntabwo uba ucyumva ko urenganywa kurusha abandi, ahubwo utangira kubona no kwemera uruhare rwawe mu bibazo ufite, aho kugira ngo uhore uvuga ko byatewe n’ibihe cg se byatewe n’abandi.

Ibyo byiciro bikomeza bikurikirana, kuri 350 uba ushobora kubabarira,

kuri 400 uba ushobora kumva abandi, kumva impamvu bagize imyitwarire runaka cg gusobanukirwa impamvu y’ibyabaye,

kuri 500 uba ufite urukundo,

kuri 600 uba ufite amahoro kandi wumva uri mu bahiriwe,

kuva kuri 700 uba uri mu gice kimurika (illumination)

byose biba biva muri njyewe, mba mbisobanukirwa mu myumvire yanjye.

Muri make ibyo dufata nk’ukuri biri hanze yacu byose ni ukwibeshya cyane ahubwo ibyo ibitekerezo byacu bitubwira ni ko kuri, mbese turema ukuri kwacu dushaka, kuvuye mu bitekerezo byacu.

Tubararikiye kuzasoma ibice bizakurikira kugira ngo tuzashobore gusobanukirwa kurushaho ko kubabarira abaduhemukiye ari ukwibabarira twebwe ubwacu (ukwiha ibyiza ku giti cyacu).