Icyo bita gucura (menopause) ni iki?

Gucura ni igihe umugore ageramo, ibyo bita imirerantanga (ovaires) bigabanya gukora umusemburo witwa oestrogenes, imihango ikagenda igabanuka yageraho igahagarara. N’ubwo abagore benshi bagera mu gihe cyo gucura ku myaka 50, ariko hari n’abo biza hagati y’imyaka 40 na 55. Bavuga ko abagore bacuze iyo hashize umwaka batakibona imihango. Imihango yegereza gucura iba ihindagurika cyane,  kandi ikaza ari mike cyane.

Igihe kibanziriza gucura (pre-menopause) abagore benshi batangira kugira impinduka mu mubiri wabo.  Imihango ihindagurika, kumva ibisa n’ubushyuhe mu mubiri  ukaba wabira ibyunzwe kandi ikirere kidashyushye, kugira umunabi, gusinzira nabi, …

Ushobora no kugira ibibazo bijyanye n’imitekerereze bitewe n’uko wa musemburo utagikorwa, bikanaterwa kandi no kudasinzira neza.  Kugabanuka k’uwo musemburo gutera ibibazo bitandukanye mu mubiri, haba mu nda ibyara, mu magufa, mu mitsi y’amaraso, mu mabere, ku ruhu, mu miyoboro y’inkari no mu rwungano ngogozi (inzira inyurwamo n’ibyo turya). 

Hari ibimenyetso byerekana ko, uko kwivumbagatanya k’umubiri kugaragara bitewe n’uko nyir’ugucura abyakira mu bitekerezo bye.

IBIMENYETSO BYO GUCURA

-        Ubushyuhe budasanzwe mu mubiri

-        Impinduka mu bijyanye n’ukwezi k’umugore

-        Impinduka z’ibitotsi

-        Impinduka z’imimerere (zirangwa ahanini no kugira umunabi,…)

-        Kumagara k’uruhu, k’umusatsi n’uko mu nda ibyara

-        Gushaka kwihagarika buri kanya

-        Kurwara umutwe

-        Kugira umunaniro

-        Kugira ibiro byinshi

-        Kugira ibibazo mu magufa

-        indwara z’umutima.

1.    Ubushyuhe mu mubiri

Ibyo biba ku bagore 75% bigaherekezwa no gutukura mu maso no gutera cyane k’umutima. Bimara hagati y’amasegonda 30 n’iminota ibiri. Bishobora kongerwa n’ibiribwa birimo urusenda, inyobwa bishyushye, inzoga, ikawa na stress. Akenshi bikunze gutangira biza mu masaha y’ijoro, bikazageraho bikajya biza no ku manywa. Nijoro bizana kubira ibyunzwe byinshi bigatuma umuntu adasinzira neza. Ibyo bimara amezi make ubundi bikagabanuka.

2.    Impinduka mu kwezi k’umugore

Izo mpinduka zitangira mbere yo gucura nyir’izina. Imihango ikaza ari myinshi cyane cg se ari mike, uburyo iza bigahindagurika.

Icyitonderwa:  ugomba kwihutira kwivuza niba uva nyuma yo gukora imibonano, niba mu mihango uva cyane bidasanzwe, niba uva igihe kirekire kirenze iminsi isanzwe, n’ibindi waba uri kubona bidasanzwe.

3.    Impinduka mu bitotsi

Gusinzira nabi bishobora gutuma habaho ihindagurika ry’imisemburo ibyo nabyo bigatera ibibazo byo kwibagirwa no kwitondera ibyo ugiye gukora.

4.    Kumererwa nabi mu mubiri

Kudasinzira neza n’impinduka ziturutse mu ihindagurika ry’imisemburo bitera umunabi umugore uri kwinjira mu gihe cyo gucura cg se wakigezemo. Hari n’ubwo agira ibibazo by’agahinda gakabije.

5.    Kumagara mu nda ibyara

Kugabuka k’umusemburo wa oestrogenes mu maraso bituma ururenda rutuma mu nda ibyara horohera rugabanuka, ndetse icyo gice tuvuze kigatangira kugabanuka no gutakaza ubushobozi bwo gukweduka. Izo mpinduka zose, zishobora kugira ingaruka ku mibonano mpuzabitsina no kumva utayishaka.

6.    Impinduka mu muyoboro w’inkari

Gutakaza ubushobozi kw’imikaya yegereye ku gice cy’umuyoboro w’inkari bigira ingaruka zo kunanirwa kugenzura igihe cyo gusohoka kw’inkari. Igihe ufite icyo kibazo cyo kudashobora kugenzura inkari, ukwiye kwegera abaganga kuko hari uburyo bashobora kugufasha bigasubira mu murongo.

7.    Ibibazo by’amagufa

Kugabanuka k’umusemburo wa oestrogenes bigira ingaruka ku magufa. Uwo musemburo iyo ubuze amagufa abura ibiyatunga, bityo akoroha cyane ndetse akaba yavunika ku buryo bworoshye igihe uguye.

8.    Ibibazo mu miyoboro y’amaraso no ku mutima.

Umusemburo wa oestrogenes iyo ubaye muke indwara z’imiyoboro y’amaraso ziriyongera zirimo umuvuduko w’amaraso, AVC ari nayo ndwara y’ubwonko bakunze kwita stroke, indwara z’umutima, ...

WAKORA IKI CYAGUFASHA IGIHE UGEZE MU GIHE CYO GUCURA?

Igihe utangiye kwinjira mu gihe cyo gucura urimo kurwana n’impinduka ziba mu mubiri wawe, dore bimwe mu byo ukwiye gukora byagufasha:

-        Kurya indyo yuzuye igizwe n’ibyubaka umubiri, ibirinda indwara n’ibitera imbaraga.

-        Kwirinda urusenda, ikawa, chocolat, ibinyobwa bishyushye cyane, inzoga.

-        Kurya ibiribwa bikungahaye ku myunyu ngugu ikomeza amagufa birimo amata n’ibiyakomokaho, amazi atunganyijwe arimo calcium (kalisiyumu),…

-        Gukora imyitozo ngororamubiri (nko kugenda, koga,…) kugira ngo bigufashe gusinzira nijoro, kurwanya agahinda no kwiheba, gukomeza amagufa, kugabanya ibiro, kugabanya amavuta menshi mu mubiri n’indwara z’umutima.

-        Kugira igihe cyo kuruhuka no kwita ku mubiri wawe uwukaraba, uwusiga, uwurinda umwuma, ...

-        Kugira ibyo gukora biguhuza no kugira inshuti nziza zigufasha gutambuka muri ibyo bihe neza.

https://www.vidal.fr/maladies/sexualite-contraception/menopause.html

Umwanditsi: NAHAYO Pelagie