IBIMENYETSO BIKWEREKA KO UMWANA AFITE IHUNGABANA N’UBURYO YAFASHWA

Abantu bakuru akenshi dutekereza ko ari twe tugira
ibibazo. Twibwira ko abana ntabyo bagira kuko baba bafite ababarebera,
bashinzwe kumenya ibyabo no kubitaho. Ikindi ni uko tubona bahora bakina,
tugakeka ko nta wakina ababaye. Nyamara abana nabo bagira ibibazo ku rwego
rwabo kandi iyo babigize bakabura ubafasha birabakomerera cyane, ndetse bikaba
byanabaviramo ihungabana ryangiza ubuzima bwabo bwose bw’ahazaza.
Abana bose bashobora guhungabana baba bari mu nda z’ababyeyi
babo cg se baravutse.
Reka dukurikire iyi nkuru y’umwana witwa Kasi kugira
ngo tubyumve neza.
Mu karere ka Bokoda muri Bingola hari umuhungu wari
ufite imyaka irindwi. Yari afite abavandimwe 8 ndetse yari yaratangiye ishuri
vuba aho. Buri gitondo yakundaga kujya kwiga ari kumwe n’inshuti ze, mwarimu
yabwiraga se ko akurikira mu ishuri kandi ko atangiye kumenya gusoma. Nyuma ya
saa sita Kasi yakinaga umupira n’abandi bana kandi agafasha nyina imirimo
yoroheje. Yari umwana wishimye kandi wishimiye ubuzima. Umunsi umwe Kasi abona
ko se, amara igihe kinini avugana n’abagabo bo ku musozi w’iwabo, naho nyina
akavugana n’abandi bagore bo mu itorero. Ntabwo yashishikazwaga no kumenya ibyo
baganira, ariko byatumye atangira guhangayikishwa n’ibyavugwaga. Nta muntu
wigeze amubwira ibyo ari byo, yaba ari iwabo cg se ku ishuri. Rimwe nijoro
akurwa mu bitotsi na mukuru we, hanyuma umuryango wose usohoka mu nzu wiruka.
Yumvise ko ari abagizi ba nabi babateye, ariko ntiyumvaga icyo bari bukore.
Igihe barimo bahunga yumva urusaku, ahindukiye abona undi muryango wirukanka
inyuma yabo, ariko umwana wabo muto yitura hasi maze arapfa. Nyuma ntabwo
yashoboye kwibuka uko byagenze, ariko bukeye bwaho umuryango we wose, hamwe
n’indi miryango ine baca ingando mu ishyamba ahantu hari ibihingwa.
Se wa Kasi agerageza kubitaho uko ashoboye, kandi buri
wese agakora cyane kugira ngo bubake amazu y’ibyatsi yo kwikingamo. Nta muntu
n’umwe washoboye kubwira Kasi ku byerekeye urupfu rw’inshuti ye, yapfiriye mu
maso ye, noneho Kasi akagerageza kwibagirwa ibyo yabonye. Yari afite inshuti
z’urungano bakinaga neza, maze nabo bubaka utuzu tw’abana aho bashoboraga
gukinira. Hashize igihe umwe mu bagabo atangira kwigisha abana buri gitondo.
Barateranaga bagasenga, abantu bakuru bakiga gusoma no kwandika. N’ubwo bimwe
mu byo bari bafite byashize ariko ntabwo bagize ikibazo cy’inzara. Iyo umwe muri
bo yarwaraga, bose basengaga Imana bashishikaye kugira ngo Imana imukize kuko
nta miti babaga bafite ngo bamuvure. Kasi atangira kugira ubwoba bwo kuba
yarwara. Nijoro yarotaguzwaga avuza induru kubera ubwoba. Hashize ukwezi bamwe
basubira aho bari batuye kureba uko bimeze, basanga ibintu byinshi
byarangiritse ariko basanze bashobora gusubirayo nta ngorane, nuko basubira
iwabo batangira gukorana ingufu n’umuhati kugira ngo bongere kubaka amazu yabo.
Hashize iminsi batangira kwiga. Kasi ntabwo yigeze ashaka kujya ku ishuri. Ise
yamuhatiraga kujyayo. Ku ishuri umwarimu nawe, yamubwiraga nabi kuko atiga neza
nka mbere. Yari afite ubwoba agatinya kuva mu rugo, ahubwo yumvaga ashaka
kwigumanira n’umwe wo mu muryango we. Igihe cyose humvikanye urusaku, Kasi
yarasimbagurikaga, nijoro akabyutsa umuryango we avuza induru kandi arira.
Rimwe na rimwe akanyara mu buriri, nyamara mbere y’ibyo bahunga ntabwo byari
byarabaye. Yatemberaga afite agahinda kandi rimwe na rimwe arira. Mbere yakunga
gukina n’inshuti ze, ariko ubu ntabyitabira cyane. Iyo akina n’abandi bana aba
ashaka gukina iby’intambara kandi akamera nk’ugirira abantu nabi, nyuma
bikarangira arwanye n’inshuti ze. Buri mugoroba yarundarundaga utuntu twe yumva
ko bashobora kongera guhunga, abavandimwe bo bakamuseka. Ababyeyi n’abarimu be
ntabwo bumvaga impamvu yitwara atyo. Igihe yanyaraga mu ikabutura ye cg
akarwana na bagenzi be, nyina yaramukubitaga. Ibyo byatumaga arira cyane
kurushaho, ariko imyitwarire ntihinduke. Ababyeyi be ntabwo bari bazi icyo
bagomba kumukorera.
Ni ibiki bishobora gutera
abana ihungabana?
Ibihungabanya abana ni byinshi ndetse bimwe ntabwo
tubiha agaciro kuko tubibona nk’ibisanzwe ariko ku mwana we biba bikomeye cyane. Bimwe muri byo ni ibi bikurikira:
-
Intambara
-
Urupfu
rw’umuntu we cg se uwo azi
-
Amakimbirane
hagati y’ababyeyi be
-
Uburwayi
bw’umwe mu muryango we cg uburwayi bwe ku giti cye
-
Gutereranwa
cg kutitabwaho
-
Guhohoterwa
ku mubiri no mu marangamutima haba mu rugo cg ku ishuri
-
Impanuka
-
Kubona
cg kuba mu bintu bibi ibyo ari byo byose mbere y’imyaka 18, …
Iyo abana bahuye n’ibibazo
bibahungabanya bitwara bate?
Iyo abana bahuye n’ibibazo by’ihungabana bibagiraho
ingaruka mu buryo butandukanye.
Ingaruka mu mimerere yabo
-
Guhinduka
abanyabwoba, bagashaka kwigumanira n’ababyeyi babo
-
Gutinya
abo batazi no gutinya umwijima
-
Guhora
bumva hari ikintu kibi kiri bubagwirire
-
Gutinya
kujya ku ishuri
-
Kurakara
cyane cg kugira amahane
-
Abana
bato bakunda kurwana na bagenzi babo kurusha mbere
-
Abana
bakuru bigomeka ku babyeyi no ku barezi babo kurusha uko byari bimeze mbere
-
Bagira
agahinda cyane kandi buri kanya
-
Bumva
badashishikajwe n’ubuzima, umubabaro ukuzura mu bitekerezo byabo ukabaca intege
-
Guhora
bicira urubanza ku byabaye bumva ari bo nyirabayazana
Impinduka mu mibiri yabo
-
Kugira
ibibazo mu kuvuga, bakavuga badidimanga cg bikabananira burundu
-
Kudashaka
kurya kandi bashonje cg se bagashaka kurya cyane kugira ngo bacogoze umubabaro
wabo
-
Kubabara umutwe, mu nda cg se mu bindi bice by’umubiri
Impinduka mu myitwarire
-
Kwitwara
nk’abana bato. Urugero: abana bashobora gutangira kunyara mu buriri cg konka
igikumwe cyabo kandi mbere ntabyo bakoraga
-
Kudasinzira
neza no kurota inzozi mbi, bagataka cg bagasakuza kandi basinziriye
-
Gukina
ibintu bibi
-
Kurwana
buri gihe no kurakazwa n’ubusa buri kanya
-
Kurizwa
n’ubusa kandi bitari bisanzwe
-
Kwiga
nabi mu ishuri kubera gucika intege kandi ubundi yarakurikiraga neza
-
Kunywa
ibiyobyabwenge ku bana bakuru bashaka gucogoza akababaro kabo, gutwara
ibinyabiziga bihuta cyane, kujya ahantu hashyira ubuzima bwabo mu kaga, kujya
mu gisirikare
-
Kwigirira
nabi ku mubiri wabo cg se kwiyahura
Abana bafite ibibazo
by’ihungabana bafashwa bate?
A) Niba bishoboka umuryango ugomba kuba hamwe ukagira
gahunda idahindagurika
Kugira ibikorwa bya buri munsi bizwi, biroroha
kubikora bikagirira abana akamaro.
Kubashishikariza kujya mu ishuri, gufasha abandi
imirimo no gukina na bagenzi babo
Kugira umwanya wo gukina muri hamwe nk’umuryango
imikino inyuranye, guca imigani, ibisakuzo,…
Gutangira ibikorwa kandi mukabirangiza hamwe, bituma
umwana yumva hari icyo yakoze, akiyumvamo umutekano kandi bikamufasha
gutekereza ko ejo hazaza ari heza.
Igihe ababyeyi batumvikana neza, bagomba gukemura
amakimbirane ari hagati yabo, ku bw’inyungu zabo n’iz’abana babo
B)
Abantu
bakuru bagomba kumva akababaro k’abana
Abana bumva cyane ikintu gikorerwa iruhande rwabo
kurusha abantu bakuru. Usanga bashaka kugira icyo bongera ku bivuzwe. Iyo
babuze umwanya wo kukivuga bashobora kwishyiramo ibitekerezo bitari byo.
Bagomba guhabwa umwanya wo kuvuga ibyo batekereza.
Kugira akamenyero ko kubaganiriza, by’umwihariko igihe
hari ibibazo by’ihungabana ndetse na nyuma yabyo.
Kuganira ku bibazo biriho, mukabiganira ku rwego rwabo
mudahora mubirukana ngo bajye gukina
Kubaha umwanya wo kuvuga amarangamutima bafite cg
bagize kubera ibibazo bahuye nabyo
Niba abana barenze umwe mu muryango, kugira umwanya wo
kuganira na buri mwana ku giti cye
Kubaha umwanya wo gukina kuko niho basohorera
amarangamutima yabo neza kurusha kuvuga
Kubaganiriza ku mikino mibi igaragaza amarangamutima
yabo kugira ngo bashobore gusobanukirwa ikibazo nyakuri bafite
Kubaha umwanya wo gushushanya kuko naho basohoreramo
amarangamutima yabo. Niba nta rupapuro bafite bashobora gushushanya hasi, mu
mucanga, …
Niba batazi ibyo bagomba gushushanya, basabe
bashushanye umuntu, umuryango wabo, aho batuye cg se bari batuye n’ibindi
bashaka. Ugomba kubikora uzirikana ko atari ukubigisha gushushanya ahubwo ari ukubafasha
gusohora amarangamutima y’akababaro kabo.
Niba umwana adasinzira neza, ugomba kumusobanurira ko
rimwe abantu bagira inzozi mbi bitewe n’ibihe by’ihungabana. Kumubaza niba
atekereza ko inzozi ze hari icyo zihuriyeho n’ibyamubayeho.
C)
Abantu
bakuru bagomba kubwiza abana ukuri ku byabaye
Umwana akeneye kumenya ukuri ku byabaye, ku buryo
bujyanye n’ikigero cye.
Agomba no kumenya niba icyo cyago kikiriho cg se
cyararangiye n’ibyo cyahungabanyije.
Kumenya iby’ukuri bituma atihimbira ibintu bitari byo
cg bitabaho mu mu mutwe we.
Si byiza gukabiriza icyago cg bavuge amakuba yose ashobora kwaduka.
Ababyeyi bagomba gukora gahunda y’ikizakorwa igihe
bazaba bagwiririwe n’ibyago hanyuma umuryango wose ukabiganiraho.
D) Umuryango wose ugomba gusengera hamwe
Gusengera hamwe ni byiza kuko abantu bavuga uko umunsi
wabo wagenze, buri wese ndetse n’abana bagatanga ibyifuzo byo gusengera.
Umwana uzi kuvugana n’abandi ashobora kuvugana
n’Imana.
Iyo umwana yahuye n’ikibazo hari igihe ata icyizere
ndetse akagitakariza n’Imana mu bibazo byinshi yibaza. Mugomba kubasubiza uko
bishoboka kose kandi ku buryo bubashishikariza kugirira Imana icyizere.
Dore amwe mu magambo mubashishikariza gufata mu mutwe:
Imana ni umurinzi udasinzira na rimwe
Imana ishobora gukuraho ubwoba bwacu
Imana imeze nk’umuntu ufata amatungo ye neza
Imana irahari buri gihe nk’ubuhungiro bwacu.
Icyitonderwa:
Igihe ubona ko ihungabana umwana afite rikomeye kandi
ritakizwa n’ibyo byose byavuzwe cg se ukabona ibimenyetso afite birushaho
kwiyongera biba bibi aho kugira ngo bigabanuke, ugomba kwitabaza inzobere mu bijyanye n’ihungabana bakamufasha.
Umwanditsi: NAHAYO
Pelagie
IBYIFASHISHIJWE
Igitabo cya Bible Society of Rwanda “GUKIZA IBIKOMERE BY’IHUNGABANA”, 2012