Amatwi ni igice cy’ingenzi mu buzima bw’umuntu kuko nicyo gituma dushobora kumva no kuvuga. Umuntu avuga kuko amatwi ye yumva neza. Iyo ufite ubumuga bwo kutumva no kuvuga biragorana n’ubwo bishoboka.

Ugutwi k’umuntu kugizwe n’ibice bitatu: ugutwi kw’inyuma ari cyo gice kigaragara hanze, ugutwi ko hagati n’ugutwi kw’imbere. Ibyo bice byose bigira inshingano zitandukanye ariko zuzuzanya, kugira ngo umuntu ashobore kumva.

Kuduhira mu matwi cyangwa se ibyo bita injereri ni iki?

Kuduhira mu matwi ni igihe cyose wumva ibimeze nk’amajwi mu matwi yawe wenyine, utazi isoko yayo kandi akaba adaturutse mu bivuga biri hanze yawe.

Iki ni ikibazo gikunze kumvikana mu bantu b’imyaka itandukanye hirya no hino. Uko kuduhira kurabangama cyane  ndetse bamwe na bamwe kubatera bagahangayika.

Kuduhira byumvikana mu buryo bunyuranye. Hari ubwo wumva bimeze nk’ingoma zivuga; nk’ibintu bihuha; nk’ibintu bikubanaho cg se ukumva bimeze nk’uko umutima utera.

Ushobora kubyumva mu gutwi kumwe, mu matwi yombi cyangwa se ukumva bimeze nk’ibituruka imbere mu mutwe.

Uko kuduhira hari igihe utangira ubyumva gahoro, bikagenda bikura biba byinshi.

Bishobora kuza by’igihe gito bigashira (nk’igihe byatewe n’ibicurane, ubundi burwayi buvurwa bugakira) cg se ukabyumva bihoraho. Hari ubwo bishobora kugendana no kutumva neza, kukubuza gusinzira no kukubuza gutuza ngo ukore ibyo ugomba gukora neza.

Kuduhira mu matwi (injereri) biterwa n’iki?

Kuduhira mu matwi bibamo ibice bibiri:

1.     Kuduhira guterwa n’imikorere itameze neza y’igice cy’ubwonko gishinzwe amajwi

2.     Kuduhira guturutse mu gutwi ubwako. Hari ubwo biterwa n’indwara z’amatwi, iz’imiyoboro y’amaraso cg ikibyimba kiri hafi y’amatwi.

Kuduhira mu matwi bishobora guterwa n’impamvu zinyuranye harimo:

-        Ubukurugutwa mu muyoboro w’ugutwi

-        Urusaku rwinshi rwangije ugutwi

-        Ugusaza (kugera mu myaka myinshi y’ubukure)

-        Kunywa imiti kubera uburwayi runaka ikangiza igice cy’imbere cy’ugutwi, …

-        Bishobora no guterwa n’indi mpamvu itavuzwe hano.

Bimwe mu bitera kwangirika k’ugutwi

Kwangirika k’ugutwi gushobora guterwa n’ibintu binyuranye muri byo twavuga:

Imyaka myinshi y’ubukure, urusaku rukabije rw’ibyo mukoresha mu kazi cg se urw’ibyuma by’umuziki.

Mu matwi y’umuntu habamo utwoya dutoya tunyeganyega iyo twumvise amajwi. Ibyo  bitanga ikimenyetso gisa n’amashanyarazi mu muyoboro (umwakura) w’ugutwi ujyana ku bwonko, nabwo bugasobanura iryo jwi rikubwira n’icyo rivuze. Kuduhira mu matwi cg se kutumva neza bishobora guterwa n’uko ubwo bwoya bwangiritse,  bwikunje cg se bwacitse. Iyo bimeze bityo, ubwonko bushobora kumva ibisa n’amajwi bukanayasobanura, ariko akaba ataturutse hanze y’ugutwi ahubwo ari ay’imbere mu gutwi.

Iyo kandi wumva urusaku rwinshi igihe kirekire, ibyo bishobora gutuma utakaza ubushobozi bwo kumva neza.

Ibyiza ni ukurinda ugutwi kwawe mbere y’uko kwangirika. Ugomba kugabanya urusaku rw’ibyuma bisohora amajwi, ikindi ugomba kwambara ibirinda urusaku igihe uri ahantu cyangwa se ukorera ahari urusaku rwinshi.

Uburwayi bw’ugutwi:

Uburwayi bw’ugutwi ububwirwa n’uko ufite ububabare mu gutwi, umuriro mwinshi, gushima impande z’ugutwi hakuryaryata no gusohokamo kw’ibintu runaka.

Igihe bimeze bityo kandi ukabona bitagabanuka ugomba kwihutira kwivuza.

Uguhinduka k’umuvuduko w’amaraso:

Igihe uri kumva mu matwi yawe ijwi rijyanye n’uko umutima utera akenshi biza mu gutwi kumwe. Ahanini biterwa n’umuvuduko w’amaraso, uburwayi bw’amatembabuzi aba mu gutwi, ibinure byinshi mu maraso, kuvuburwa k’umusemburo mwinshi wa thyroide,…

Igihe ubyumva ku buryo buhoraho wagana umuganga akagufasha.

Ibindi bibazo by’ubuzima:

Hari igihe kuduhira mu matwi bishobora guterwa n’ibindi bibazo by’ubuzima birimo ibibazo byo mu mutwe nk’agahinda gakabije, guhangayika cyane (stress),…

Ibindi bitera kuduhira ko mu matwi harimo uburwayi bwa diyabete n’imiti imwe n’imwe (iya kanseri, antibiotiques, ivura ububabare,…), kugira isereri nabyo bishobora gutera injereri mu matwi no kugabanuka ko kumva.

Ese wakora iki igihe wumva ukuduhira mu matwi?

N’ubwo hari imiti igabanya injereri zo mu matwi, hari ingamba umuntu aba akwiye gufata zimufasha kwirinda kugira icyo kibazo.

1.     kwirinda urusaku rukabije

Niba waratangiye kugira ibibazo by’injereri mu matwi, ugomba kwirinda ikintu icyo ari cyo cyakwangiza ugutwi kurushaho. Ugomba kumva amajwi ari ku rugero ruringaniye kandi ukirinda kumara umwanya ahantu hari urusaku rwinshi.

Ugomba kwirinda gushyira mu matwi utwuma tuyakurura (écouteurs) ahubwo ugakoresha ibigabanya amajwi birinda amatwi niba ubifite.

2.     Kwirinda ibitera injereri harimo:

Isuku y’amatwi idahagije ishobora kuba intandaro cg ikongera injereri zo mu matwi;

Indwara ya Gisukari (diyabete) idacunzwe neza, umuvuduko w’amaraso, ikawa, itabi,… bishobora kuba intandaro yo kugira cg kumva injereri zo  mu matwi.

kwirinda ahantu hacecetse cyane igihe ufite injereri mu matwi, kuko kumva umuziki udasakuza nk’igihe uri wenyine cg ugiye kuryama bishobora gutuma utumva uko kuduhira.

ICYITONDERWA:

Igihe nta kibazo kidasanzwe cy’uburwayi cyagaragaye mu matwi no mu bindi bice by’umubiri, ariko kuduhira mu matwi bigakomeza, ubifite ashobora kubana nabyo ntibigire icyo bimutwara.

Niba byaraje nyuma yo gukomereka ku mutwe cg yo kuwukubita ahantu runaka, niba uri kunanirwa kumva, uri kugira isereri, niba ufite ikindi kibazo kitavuzwe, ihutire kwivuza.

Umwanditsi: NAHAYO Pelagie

Ibyifashishijwe

https://www.livi.fr/en-bonne-sante/bourdonnement-oreille/