Muri iki gihe tugezemo cy’ikoranabuhanga, iterambere ry’imyumvire bikomeje kwaguka, gukundana mu rubyiruko biracyafatwa nk’ingingo ikomeye mu miryango. Abenshi mu ngimbi n’abangavu bahitamo gukundana mu ibanga rikomeye batabibwiye ababyeyi/abarezi babo n’abandi bantu bakuru bashobora kubagira inama . Ni imyitwarire imenyerewe ariko yibazwaho byinshi ku mpamvu ziyitera n’ingaruka ishobora gutera.

Ku rubyiruko rwinshi gukundana mu ibanga ntibiterwa no kwigomeka gusa, ahubwo binaterwa no kwirinda ingaruka bashobora guhura nazo mu miryango. Hari abaturuka mu miryango ifite amabwiriza akaze aho gukundana ku mwana ukiri muto bibujijwe burundu; abandi bakaba bafite ubwoba bwo gucirwa urubanza. Mu rwego rwo kwirinda ibibazo abenshi bahitamo guhisha umubano wabo aho kuwusobanurira ababyeyi.

N’ubwo gukundana mu ibanga ku rubyiruko ari ukubaho ubuzima bwabo bwite ntawe ubyivanzemo ariko kandi bishobora no gushyira ubuzima bwabo mu kaga. Igihe badafite ababyeyi cyangwa abandi bantu bakuru babagira inama, bashobora gufata ibyemezo batatekerejeho cyane bishingiye ku marangamutima aho  gushingira ku bwenge no ku kuri k’ubuzima.

Zimwe muri izo ngaruka ni izi:

Gutakaza icyizere hagati y’abana n’ababyeyi

Iyo uwo mubano w’ibanga ugaragaye, ababyeyi bumva barabeshywe bikagabanya icyizere bagiriraga abana babo, bumva badahabwa agaciro (basuzugurwa), ibyo nabyo bigatera amakimbirane akomeye mu muryango.

Abana bahora ku gitutu cyo gushaka ibyo babeshya ababyeyi

Guhishahisha no guhora ushaka ibyo uri bubeshye nabyo ni umutwaro uremereye mu mutima w’umwana kuko bishobora kumutera guhora afite ubwoba bwo gufatirwa mu cyuho, guhora yicira urubanza kubera ko arimo yumva bitemewe ibyo nabyo bikamutera kumererwa nabi mu marangamutima. Ibyo byose bishobora kugira ingaruka ku myigire y’umwana.

Kubura ubuyobozi n’inama z’ababyeyi

Iyo umubano ari ibanga ntibiba byoroshye kubona inama z’ababyeyi cyangwa iz’abantu bakuru. Ibyo bivuze ko umwana ashobora gufata ibyemezo atatekerejeho

Kwishora mu mibanire yakwangiza ubuzima bwe

Kutamenya aho agomba kugarukira mu rukundo

Abana bagirana imibanire y’urukundo n’abantu bashobora kwangiza ubuzima bwabo

Kuko nta nama z’abakuru abona umwana uri mu rukundo rwihishe ashobora gukoreshwa ibyo atazi cyangwa adashaka, gukoresha ibiyobyabwenge, kwigishwa guhohoterana, guhohoterwa mu mitekerereze, kwigishwa gukoresha umubiri nabi,… ibyo byose bigenda biba bibi kurushaho iyo umwana abicecetse.  

Abana bagira imyitwarire idahwitse adatekereza ku ngaruka zayo

Gufata icyemezo cyo kujya mu rukundo imburagihe bishobora gutuma umwana 

Atera cyangwa aterwa inda imburagihe, yandura indwara  zandurira mu mibonano mpuzabitsina,

Afata ibyemezo byo guhurira n’abantu ahantu hadafite umutekano;

Gutakaza umwete mu masomo

Niba umwana ari mu rukundo rw’ibanga, ibyo bishobora gutuma:

atita ku masomo ye, gutakaza intego y’ahazaza no kutitabira neza inshingano ze.

Kugira ibibazo bijyanye no kwigirira icyizere

Urukundo rudashyirwa ku mugaragaro rushobora gutuma umwe mu bakundana yumva atubahwa uko bikwiye kuko bamuhishahisha, akumva ari umuntu uciriritse cyane, akumva ateye isoni, akora ibyo abwiwe byose, ibyo byose bikagabanya icyizere umuntu akwiye kwigirira mu buzima busanzwe.

Abana bakundana mu ibanga, kugira ngo batavumburwa. Mu ruhame bakaba ari inshuti zisanzwe, ariko ahandi bakaba bakundana bikomeye kandi bya nyabyo. Hari igihe kandi ibyo babifashwamo n’inshuti zabo zibakingira ikibaba muri gahunda zitandukanye zaba iz’ukuri cyangwa iz’ibinyoma zifasha abo bakundana guhura.

Nk’uko byavuzwe hejuru, urukundo rwo mu ibanga ruzana ibibazo byinshi, ibyiza ni uko abana bajya baganiriza abayeyi ku buzima bari gucamo, ababyeyi nabo bakwiye kuganiriza abana kugira ngo icyo cyizere kibe hagati yabo baganire kuri byose, bityo be kuba mu buzima bwo kwihishahisha ahubwo babeho biyizeye kandi bashaka inama zabagirira akamaro.

Umwanditsi NAHAYO Pelagie