Umuryango wa Commonwealth ni umwe mu mashyirahamwe ya politiki amaze igihe ku isi. Inkomoko yawo ituruka ku Bwami bw'Ubwongereza, igihe ibihugu bimwe byo ku isi byakoronizwaga n’Ubwongereza.

Nyuma y’igihe, ibihugu bitandukanye byakoronijwe n’Abongereza byabonye ubwigenge bucagase (Semi-independent countries).

Mu nama yabaye mu 1926 yitabiriwe n’Ubwongereza n’abayobozi ba Ositaraliya, Kanada, Ubuhinde, Leta yigenga ya Irlande, Newfoundland, Nouvelle-Zélande na Afurika yepfo, bemeje ko bose ari abanyamuryango bangana mu muryango w’Ubwongereza. Uyu muryango witwaga (the British Commonwealth of Nations) cyangwa Commonwealth gusa.

Nyuma yaho ni bwo ibihugu byagiye bibona ubwigenge bwuzuye.

Mu nama ya ba Minisitiri w’intebe ba Commonwealth yabereye i Londres mu 1949, Itangazo ry’i Londres ryavuze ko n’ibindi bihugu na za guverinoma bitakoronijwe n’Ubwongereza bishobora kuba bimwe mu bigize umuryango wa Commonwealth. Ibihugu bimaze kujya mu muryango wa Commonwealth bitarakoronijwe n’Ubwongereza ni Mozambique n’u Rwanda, u Rwanda akaba ari cyo gihugu giheruka kwinjira mu muryango wa Commonwealth mu mwaka wa 2009. Kugeza uyu munsi Commonwealth igizwe n’ibihugu 54: ibyo muri Afurika (19), Aziya (8), Uburayi (3), Pasifike (11), ibirwa bya Karayibe na Amerika (13) bituwe n’abagera kuri miliyari 2.5.

Guhera mu mwaka 1971 ni bwo hatangiye kujya hakorwa inama z'abayobozi b'ibihugu na za guverinoma bahuriye mu muryango wa Commonweath (CHOGM). Guhera ubwo itangira kujya iba buri myaka 2 ikayoborwa na Minisitiri w'Intebe cyangwa Perezida w'igihugu cyayakiriye ari na we uyobora uyu muryango mu gihe cy'imyaka 2 ikurikiraho kugeza hateguwe indi CHOGM. Bivuzeko Perezida w’u Rwanda Paul KAGAME ari we uzayobora uyu muryango kugeza mu 2024, aho awusimbuyeho Minisitiri w’intebe w’Ubwongereza Boris Johnson.

Umwami George wa VI ni we wabaye Umuyobozi wa mbere wa Commonwealth, amaze gupfa asimburwa n’Umwamikazi Elizabeth wa II. Ariko umwami cyangwa umwamikazi w’Ubwongereza ntabwo ari ihame ko ahita ayobora Commonwealth. Ibihugu bigize Umuryango wa Commonwealth ni byo bihitamo uzaba Umuyobozi wa Commonwealth.

Ubunyamabanga bwa Commonwealth bwashinzwe mu 1965 nk'umuryango uhuriweho na guverinoma ishinzwe gucunga ibikorwa bya Commonwealth.

Uru ni urutonde rw’ibihugu bigize umuryango wa Commonwealth n’umwaka byinjiriyemo:

Antigua and Barbuda (1981), Australia (1931), Bahamas (1973), Bangladesh (1972), Barbados (1966), Belize (1981) , Botswana (1966), Brunei (1984), Cameroon (1995), Canada(1931), Cyprus (1961), Dominica (1978), Eswatini (Swaziland), Fiji (1971), Gambia (1965), Ghana (1957), Grenada (1974), Guyana (1966), India (1947), Jamaica (1962), Kenya (1963), Kiribati (1979), Lesotho (1966), Malawi (1964), Malaysia (1957), Maldives (1982), Malta (1964), Mauritius (1968), Mozambique(1995), Namibia (1990), Nauru (1968), New Zealand (1931), Nigeria (1960), Pakistan (1947), Papua New Guinea (1975), Rwanda (2009), Saint Kitts and Nevis(1983), Saint Lucia (1979), Saint Vincent and the Grenadines(1979), Samoa (1970), Seychelles (1976), Sierra Leone (1961), Singapore (1965), Solomon islands (1978), South Africa(1931), Sri Lanka (1948), Swaziland (1968) Tanzania (1961), Tonga (1970), Trinidad and Tobago (1962), Tuvalu (1978), Uganda (1962), United Kingdom (1931), Vanuatu (1980), Zambia (1964).

                                  CHOGM 2022 iri kubera mu Rwanda

Yanditswe na HIMBAZA Yves