Mu kiganiro yakoze kuri televiziyo y’igihugu Dr. UWAMARIYA Valentine yasobanuye ko ari ikibazo cyari kimaze gufata indi ntera aho wasangaga buri kigo gishyiraho igiciro cyishakiye nubwo byabaga bivugwa ko byashyizweho n’ababyeyi ariko ugasanga ababyeyi nanone nibo bari gutaka bavuga ko bikabije.

Yagize ati:”hari igihe wasangaga ibigo bitandukanye byatse amafranga yo kugura igikoresho kimwe ariko ugasanga ibiciro bitandukanye cyane, cyangwa ugasanga ibikoresho biri gusabwa byakabaye bigurwa n’ikigo ubwacyo” aho yatanze urugero rwo kugura imodoka y’ikigo, Inyubako z’ikigo,... Yagarutse no ku kibazo cy’uko hari abanyeshuri boherezwaga kubigo bimwe na bimwe bakananirwa kujyayo kubera amafranga ari hejuru kandi ari ibigo bya leta, ndetse ibiciro bihindagurika buri mwaka ugasanga biri guteza akajagari.

Yagarutse kubigo byashakaga abandi barimu bakazamura amafranga y’ishuri ngo babashe kwishyura abo barimu kandi abarimu ubusanzwe bishyurwa na leta, asobanura ko mu gihe ikigo gifite ikibazo cy’abarimu kigomba kubigeza kuri minisiteri ikabaha abarimu ikanabishyura, avuga ko bitumvikana ukuntu mu kigo kimwe usangamo abarimu bamwe bahembwa na leta, abandi bagahembwa n’ikigo.

Abajijwe kukijyanye na competition cyangwa guhangana kw’ibigo kwabagaho, niba uku kuringaniza amafranga bitatuma bigabanuka yasubije ko utahuza competition n’amafranga kuko hari n’ibigo bitagezaga ku mafranga yashyizweho kandi byari bisanzwe bikora neza.

Yavuze ko ariya mafranga ibihumbi 7000 ariyo azajya akurwamo ibyo ikigo cyakenera kubabyeyi nk’inyunganizi mu guteza imbere ishuri.

Abajijwe kukijyanye n’izamuka ry’ibiciro ku isoko niba bitazaba imbogamizi ku bigo, yavuze ko mu kugena ariya mafranga bari barebye ibiciro biri ku isoko avuga ko ntakibazo kizabaho, kandi ko hazajyaho itsinda ryo gukurikirana uburyo amashuri ashyira mu bikorwa iki cyemezo, ndestse no kubijyanye n’imirire yuzuye.

Yabajijwe uko abayobozi bakiriye iki cyemezo avuga ko babanje kuganira n’abayobozi b’ibigo ko babyumvikanyeho.

Abajijwe ku kijyanye n’amashuri yigenga ariko yakira abanyeshuri boherejwe na leta yavuze ko bo bazajya bishura nk’ayo mu mashuri ya leta.

Yanditswe na HIMBAZA Yves